O cineasta Jonás Trueba recibirá o Premio Cineuropa este xoves

Cineuropa entregará este xoves ás 20.30 horas no Teatro Principal o seu terceiro Premio Cineuropa 2025 a Jonás Trueba, cineasta cuxa obra, profundamente humanista e luminosa, marcou o pulso emocional do cinema español e europeo das dúas últimas décadas. O festival recoñece así unha traxectoria que combina sensibilidade, intelixencia narrativa e unha reflexión constante sobre a memoria, o tempo e a esencia mesma das relacións humanas.

Quince anos de encontros: Jonás Trueba e Cineuropa

A relación de Jonás Trueba con Cineuropa remóntase a 2010, cando presentou en Santiago a súa ópera prima, Todas las canciones hablan de mí. Aquel primeiro encontro, marcado pola proximidade co público e un coloquio memorable, converteuse no inicio dunha complicidade que se mantivo ao longo de quince anos e sete películas. Desde entón, Trueba regresou en múltiples edicións, consolidando un vínculo sostido pola coherencia da súa traxectoria e pola afinidade co espírito do festival. 

Sete películas e quince anos de complicidades foron consolidando unha relación especial entre o cineasta e o festival compostelán. Recoñecido en festivais como San Sebastián, galardoado en Cannes —onde Volveréis foi premiada na Quincena de Cineastas— e candidato aos César en Francia, Jonás Trueba é hoxe unha referencia ineludible dun cinema europeo que pensa, sente e conmociona.

Neste regreso a Cineuropa, Jonás Trueba volve ofrecer un “gran clásico”: unha celebración do cinema como fogar, memoria e descubrimento. Tras a entrega do Premio Cineuropa, a sesión completarase coa proxección de Ilusos e Miniaturas, ambas dirixidas polo cineasta.

Proxeccións desta semana en Cineuropa

Ao longo desta semana, Cineuropa continúa tamén coa exhibición dalgunhas das películas máis destacadas da tempada europea. Entre elas figura Orphan, a nova obra de László Nemes, director de O fillo de Saúl, que regresa cun relato ambientado na Hungría de 1956, nun país ferido pola represión soviética. A través da historia íntima dun adolescente en busca da súa verdade e da súa identidade, Nemes constrúe unha posta en escena abafante e profundamente humana, que confirma o seu lugar como unha das grandes voces do cinema contemporáneo. Presentada en Venecia, Orphan está considerada xa unha das películas do ano.

Tamén se presenta O mago do Kremlin (Le mage du Kremlin), de Olivier Assayas, adaptación da novela de Giuliano da Empoli que reconstrúe, desde as entrañas do poder ruso, a ascensión política de Vladimir Putin a través do seu asesor máis próximo. Con Paul Dano, Jude Law e Alicia Vikander nun elenco de luxo, Assayas ofrece un filme hipnótico sobre a manipulación, o poder e a fronteira difusa entre a verdade e a ficción, reafirmando a súa condición de autor versátil e politicamente incisivo.

Entre as estreas máis esperadas destaca así mesmo Quenda de garda (Late Shift), de Petra Volpe, un thriller que transcorre nunha única noite no servizo de urxencias dun hospital suízo. A protagonista, unha enfermeira perfeccionista e entregada, enfróntase ao peso dun erro fatal que desencadea unha carreira contrarreloxo cargada de tensión, humanidade e dilemas morais. A película, considerada unha das favoritas aos Óscar de fala non inglesa, afonda nas fendas do sistema sanitario e na vulnerabilidade das emocións en situacións límite.

O programa inclúe igualmente Unha pantasma útil (Pee Chai Dai Ka/ A useful ghost), sorprendente ópera prima de Ratchapoom Boonbunchachoke, gañadora do Gran Premio da Semana da Crítica de Cannes. A película comeza como unha comedia fantástica —o espírito dunha muller falecida posúe un aspirador para seguir preto do seu marido—, pero pronto se transforma nunha poderosa metáfora política sobre os desaparecidos nun réxime oligárquico, articulando unha historia á vez insólita, poética e fondamente conmovedora.

Outra das obras máis celebradas da tempada é Soños en Oslo (Dreams), de Dag Johan Haugerud, gañadora do Oso de Ouro na Berlinale. Haugerud mergúllase aquí na confusión e intensidade do primeiro amor dunha estudante pola súa profesora, un relato que se amplía cara a unha reflexión sobre a moralidade, a intimidade compartida e a exposición pública dos afectos a través da escrita, nun filme marcado pola súa delicadeza psicolóxica e o seu profundo sentido da empatía.

A programación da semana complétase con Emergency Exit, a nova película de Lluís Miñarro, quen presentará persoalmente o filme. Trátase dunha viaxe tan realista como onírica nun autobús poboado por pasaxeiros que non poden —ou non queren— baixar, nun exercicio de realismo máxico que mestura humor, melancolía e ecos buñuelescos. A obra supón ademais a última aparición de Marisa Paredes na gran pantalla.

Finalmente, Cineuropa exhibe Como na casa/ Feels Like Home, de Gábor Holtai, Premio Méliès de Prata no Festival de Sitges, unha alegoría política en forma de thriller sobre unha muller secuestrada por unha familia que está convencida de que é a súa filla desaparecida. A película combina precisión visual, humor escuro e unha incisiva lectura social do presente europeo, consolidando a Holtai como unha das voces emerxentes máis prometedoras do cinema húngaro.

Sedes do festival e información práctica

O Teatro Principal, o Salón Teatro, o Auditorio de Galicia, NUMAX, e a Zona C abeirarán as proxeccións e actividades desta edición. As entradas e bonos están á venda no despacho de billetes da Zona C e na web compostelacultura.gal.

Apoios e colaboracións

Cineuropa é un festival organizado polo Concello de Santiago de Compostela, co apoio do Consorcio de Santiago e a Deputación da Coruña, e a colaboración de diferentes institucións como o Instituto Camões, a Xunta de Galicia - AGADIC e a Universidade de Santiago de Compostela, alén doutras entidades culturais e empresariais da cidade.