A Real Filharmonía de Galicia celebra o legado da familia Schumann entre ecos románticos e creacións actuais

A Real Filharmonía de Galicia presenta esta semana un programa dedicado á familia Schumann, un retrato musical do diálogo entre o amor, a creación e o legado romántico. O concerto terá lugar xoves, día 13 de novembro ás 20.30 horas na Sala Ángel Brage do Auditorio de Galicia, baixo a batuta do seu director titular e artístico, Baldur Brönnimann.

Ofrecerá dúas estreas destacadas: a da obra TAU, da compositora galega Leticia Goás, e a estrea en España de Clara, da mexicana Gabriela Ortiz. As peza de Ortiz dialoga coa historia de Clara e Robert Schumann, protagonistas tamén da segunda parte do programa grazas á interpretación da Sinfonía núm. 3 en Mi bemol maior, Op. 97 “Renana” de Robert Schumann.

Un novo cometa
A estrea mundial de TAU, de Leticia Goás, insírese no proxecto “Cometas”, impulsado pola Real Filharmonía de Galicia. Trátase dunha serie de encargos de pequenas obras que buscan celebrar o 30º aniversario da orquestra co obxectivo de dar visibilidade aos compositores e compositoras actuais. Goás, compositora e pianista coruñesa, destaca polo seu traballo exploratorio arredor da cor orquestral e a relación entre a materia sonora e o espazo. En TAU propón unha reflexión sobre o tempo e a enerxía vital, expandindo o seu universo creativo con linguaxes actuais e sutís ecos do romanticismo.

Gabriela Ortiz: unha voz latinoamericana con acento universal
A segunda obra do programa, Clara, pertence á recoñecida compositora mexicana Gabriela Ortiz, unha das figuras máis relevantes da creación musical contemporánea en América Latina. Ortiz reivindica a mestizaxe como ponte entre a alta cultura e a cultura popular, unindo tradicións europeas coa riqueza rítmica e melódica mexicana.

Clara, articulada en cinco movementos, é unha evocación íntima da vida e da paixón creativa de Clara Schumann, a célebre pianista e compositora do século XIX. A peza retrata momentos da súa intensa relación con Robert Schumann, ofrecendo unha visión contemporánea e feminina dun dos grandes amores da historia da música.

A sinfonía da Renania: o espírito do Romanticismo
A segunda parte do concerto estará dedicada á Sinfonía núm. 3 en Mi bemol maior, Op. 97 “Renana”, composta por Robert Schumann en 1850. Inspirada pola súa chegada a Düsseldorf como mestre de capela, a obra recrea a viaxe que realizou coa súa muller Clara e os seus sete fillos pola rexión do Rin.

Dividida tamén en cinco movementos, a Renana é un retrato sonoro da alegría, da devoción e da natureza, culminando nun cuarto movemento de profunda exaltación romántica. Xunto coa Pastoral de Beethoven, que Schumann tanto admiraba, representa un dos cumes da sinfonía do século XIX.

Baldur Brönnimann, un director comprometido
O suízo Baldur Brönnimann, director titular e artístico da Real Filharmonía de Galicia, é coñecido pola súa versatilidade e pola súa aposta pola música actual. Con ampla traxectoria internacional, combina a dirección do gran repertorio sinfónico co impulso a novas voces compositivas. Baixo a súa batuta, a Real Filharmonía reafirma o seu papel como referente da creación musical contemporánea e como entusiasta do talento galego.

Deste xeito, co fin de achegar aínda máis o público ao universo da música clásica, ás 19:45h, na Sala Mozart do Auditorio de Galicia, Baldur Brönnimann e Leticia Goás falarán sobre as obras interpretadas nunha nova edición do ciclo ‘Conversando con…’.

Entradas á venda

As entradas para o concerto deste xoves 13 ás 20.30 horas poden mercarse na web de Compostela Cultura, no despacho de billetes da Zona C e no do Auditorio (neste caso, só o día do concerto dende unha hora antes do seu comezo) a un prezo de 15€.