‘Facemos e xa vemos’, unha conversa con Ana Moure Rosende para afondar na relación entre arte, colectivo e territorio

A Zona C acolle esta mércores, 14 de xaneiro ás 18.00 horas,  a conversa Facemos e xa vemos, un encontro coa artista Ana Moure Rosende, integrante do colectivo La cuarta piel, que convida a afondar na práctica artística colectiva, na relación co territorio e nas formas de convivencia que se activan desde a creación contemporánea. A actividade inscríbese no marco da mostra Acumulacións dun presente moi pasado, actualmente en exhibición neste  espazo expositivo da praza de Cervantes.

Durante a conversa, Ana Moure Rosende compartirá as claves conceptuais e os procesos de investigación que sustentan esta instalación, un proxecto que imaxina unha expedición humana a futuras paisaxes xeolóxicas formadas polos residuos acumulados nas marxes urbanas. A proposta convida a observar os restos da vida contemporánea como estratos dunha paisaxe artificial chamada a perdurar durante milleiros de anos, mesmo máis alá da presenza humana.

A instalación traballa con materiais sometidos a distintos procesos de desintegración para poñer en diálogo dous polos aparentemente opostos: os obxectos prezados e os refugallos. Ambos, porén, comparten un destino común, ao integrarse nunha mesma memoria material do planeta. A partir desta idea, Acumulacións dun presente moi pasado propón imaxinar novas covas, ecosistemas e reliquias que poderán emerxer destas montañas artificiais no futuro, abrindo preguntas sobre que vestixios deixará a nosa era.

Nun contexto de colapso na xestión global dos residuos, con infraestruturas saturadas e depósitos ao límite, o proxecto reflexiona tamén sobre aquilo que a sociedade escolle ocultar e sobre a tendencia a idealizar determinados obxectos como símbolos afectivos ou talismáns. Esa contradición dá lugar a novas cordilleiras creadas polo humano, cargadas de potencial narrativo, histórico e ecolóxico.

Na conversa Facemos e xa vemos, a artista propón un achegamento próximo aos procesos creativos e ás preguntas que atravesan a mostra, á súa relación cos proxectos de investigación artística de La cuarta piel, poñendo o acento na creación colectiva, na transdisciplinariedade e na necesidade de repensar a nosa relación co territorio desde prácticas situadas e compartidas.

Acumulacións dun presente moi pasado é unha das propostas seleccionadas na convocatoria de proxectos de intervención artística da Zona C de Compostela Cultura para o período 2024–2025 e poderá visitarse até o 7 de febreiro, de martes a sábado, en horario de 11 a 14 e de 16 a 19 horas. A conversa Facemos e xa vemos ten acceso libre ata completar capacidade.