A historia d’O Xestal faise teatro con 'Apaga o candil'

31/08/2025

A compañía Contraproducións presenta no Teatro Principal unha obra escrita e dirixida por Cándido Pazó que recupera a figura do narrador e humorista Carlos Díaz ‘O Xestal’ · ‘Apaga o Candil’ chega a Compostela con dous pases, o venres 9 e o sábado 10 de maio ás 20.30 horas, e cunha conversa co equipo creativo tras a primeira das funcións · As entradas poden ser adquiridas de forma anticipada na web de Compostela Cultura e no despacho de billetes da Zona C, alén de no propio Teatro dende unha hora antes do comezo de cada pase
 

A axenda escénica de Compostela Cultura volve abrir esta fin de semana unha porta á memoria coa obra Apaga o Candil, unha montaxe da compañía teatral Contraproducións, coa colaboración do FIOT, que leva á escena a figura e a historia de Carlos Díaz ‘O Xestal’, un narrador, humorista e cantante coruñés ben popular nos anos 60 e 70 tras un grande éxito como contador no programa Desfile de estrellas, de Radio Nacional de España.

Dúas funcións no Teatro Principal, o venres 9 e o sábado 10 de maio ás 20.30 horas, para traer ao recordo esta personaxe incómoda, autor de chanzas e relatos con marcada carga reivindicativa que, a golpe de contos, cantigas e chistes recollidos en discos e gravacións superventas se fixo un lugar de seu no imaxinario colectivo.  Un espectáculo que, tal e como sinala a compañía, procura “reivindicar a riqueza da tradición oral e a memoria rural como unha das bases da identidade cultural”.

Con autoría e dirección de Cándido Pazó, a obra preséntase como unha comedia poética que tende unha ollada humorística á tradición popular galega a partir dun detonante clásico: o enfrontamento coa morte. Sobre o escenario, o protagonista, O Xestal, a piques de morrer, mantén unha delirante e entrañable conversa coa Parca, nunha encrucillada de camiños e lembranzas, entre contos e resistencia ante á idea da finitude. 

Os actores Toni Salgado e Avelino González protagonizan 'Apaga o Candil'
Avelino González e Toni Salgado conforman o elenco desta proposta que conta coa música de Xurxo Souto e Richi Casás, a escenografía de Pablo Giráldez “O Pastor”, a iluminación e técnica de Miguel Cabaleiro e Afonso Castro, a asesoría no baile de Chus Caramés, vestiario de De Cotío e gravación de Tomás Ageitos. A función do 9 de maio incluirá unha posfunción con diálogo co público para coñecer de primeira man o tecido deste traballo encadrado no foco ‘Memoria en escena’ de Compostela Cultura.
As entradas para ambos os pases (12 € con descontos do 50% para diferentes colecitvos) poden ser adquiridas de forma anticipada na web de Compostela Cultura e no despacho de billetes da Zona C e tamén estarán dispoñibles no propio teatro dende unha hora antes do comezo de cada función.