'Xpectro', de Zen del Sur, chega ao Auditorio de Galicia cunha proposta escénica que celebra a diversidade

O Auditorio de Galicia acolle o domingo 8 de febreiro, ás 18.00 horas, Xpectro, un espectáculo multidisciplinar da compañía Zen del Sur que combina circo, danza e música en directo para construír unha experiencia escénica profundamente sensible e poética. 

Dirixido a público a partir de 10 anos, e cunha duración aproximada de 55 minutos, Xpectro propón unha inmersión nun universo creativo situado nun recuncho da mente de dous seres que levan no corpo trazos de neurodiverxencia e conservan no seu interior pegadas do pasado. A través do movemento, do risco físico e da música, atopan un espazo común para expresarse, comunicarse e afrontar desafíos, ofrecendo ao público unha ollada empática e aberta cara á diversidade e ás múltiples formas de percibir o mundo.

A obra destaca pola fusión de diferentes linguaxes do movemento coa música en directo, dando lugar a unha proposta escénica de gran forza emocional que convida á reflexión sen renunciar á beleza visual nin á intensidade artística. Avalada pola crítica e polo circuíto profesional, Xpectro foi recoñecida co Premio FETÉN ao Mellor Espectáculo de Noite, o Premio Ciudad Rodrigo ao Mellor Espectáculo de Sala, o Premio Lorca ao Mellor Espectáculo de Circo e unha Mención Especial no festival Circada.

As entradas teñen un prezo de 3 euros e poden adquirirse ata o domingo a través da web de Compostela Cultura e no despacho de billetes da Zona C (aberta de martes a sábado, de 11 a 14 e de 16 a 19 horas) e, de existiren localidades dispoñibles, tamén o día do evento no despacho de billetes do Auditorio de Galicia.