Mofa e Befa levan ao Teatro Principal o universo de Castelao en ‘Os Dous de Sempre’

O Teatro Principal de Santiago acollerá entre o 15 e o 18 de abril catro representacións d’Os Dous de Sempre, o novo espectáculo de Mofa e Befa promovido por Producións Teatrais Excéntricas e dirixido por Quico Cadaval. A montaxe afonda no universo literario e humorístico de Castelao a través dunha proposta escénica que combina tradición popular, teatro físico e unha mirada contemporánea sobre a condición humana. 

Inspirada na coñecida obra de Castelao, a peza leva á escena a Pedriño e Rañolas, dous personaxes antagónicos e inseparables que encarnan, respectivamente, o impulso idealista e a dimensión máis material da existencia. A súa relación, chea de contrastes e complicidades, insírese nunha longa tradición de parellas cómicas que vai de Don Quixote e Sancho Panza aos pallasos do circo ou ás figuras do cinema mudo.

Co seu característico estilo, Mofa e Befa —o dúo formado por Evaristo Calvo e Víctor Mosqueira— acompañados no escenario por Josito Porto, mergúllanse nesta ocasión nun imaxinario que bebe do escarnio medieval, do cabaré e da cultura popular galega, conectando co humor profundamente humano de Castelao. A proposta constrúe un “retábulo da risa” onde conviven o neno, o tolo e o animal, elementos fundamentais da súa visión do mundo

A montaxe conta cun equipo artístico de ampla traxectoria, con dramaturxia de Carme Varela e Quico Cadaval e un coidado traballo escénico e lumínico a cargo de Baltasar Patiño. Recomendada para maiores de 13 anos, e cunha duración superior aos 90 minutos, Os Dous de Sempre preséntase como unha oportunidade para redescubrir, desde o humor e a emoción, un dos textos fundamentais da cultura galega contemporánea.

As funcións no Teatro Principal, programadas do mércores 15 ao sábado 18 de abril ás 20.30 horas e que xa esgotaron as localidades á venda, enmárcanse no Foco Castelao en Escena da programación teatral de Compostela Cultura, que conta co apoio da Deputación da Coruña e o Consorcio de Santiago.

Arredor da peza, artéllanse diferentes actividades de mediación que buscan ofrecer ao público oportunidades para afondar no proceso creativo desta montaxe. A primeira delas é a posfunción, un coloquio aberto co equipo artístico que terá lugar no Teatro Principal o propio día 15 ao remate do primeiro pase. Xa o martes 21 de abril, o Auditorio de Galicia acollerá a sesión Tramoia. Anatomía dunha peza teatral. Os Dous de Sempre, un encontro con Carme Varela e Quico Cadaval para coñecer de primeira man o desenvolvemento do espectáculo: dende o proceso de adaptación da obra de Castelao, ás decisións que determinaron a posta en escena, e mesmo a aquelas ideas e camiños creativos que quedaron fóra do resultado final. A asistencia a este encontro é libre ata completar capacidade