(IN)VISIBLES E SONORAS, unha nova edición das Xornadas de Música Contemporánea

A concelleira de Acción Cultural, Mercedes Rosón, presentou esta mañá unha nova edición das Xornadas de Música Contemporánea que este ano levan por título (IN)VISIBLES E SONORAS. Fíxoo acompañada de Xosé Luís Penas, deputado provincial da Deputación da Coruña; Mar Lorenzo, vicerreitora de Igualdade, Cultura e Servizos da USC; e Santiago Olmo, director do CGAC, en representación das entidades que organizan as Xornadas, que contan tamén co apoio do Consorcio de Santiago.

Serán un total de 3 coloquios e 9 concertos que se celebran do 1 ao 29 de xuño e que ofrecen programas con obras compostas por mulleres case na súa totalidade. De aí o título desta edición, que responde a que o eixo transversal de todo o ciclo son as mulleres: compositoras, intérpretes, estudosas… En palabras da concelleira de Acción Cultural, Mercedes Rosón, quen tamén é concelleira de Igualdade, “desde Compostela Cultura programamos para colocar o feminino no lugar que lle corresponde, unha débeda que temos desde hai tempo como sociedade e que traballamos por saldar” ao que engadiu: “Levamos anos desenvolvendo o programa Womarts da Unión Europea e traballamos sempre considerando a programación feita e desenvolta por mulleres como un eixo trasnversal de todos os nosos ciclos”.

As mulleres, visibles e sonoras por mérito propio

A programación comeza o martes 1 cun Solo de Arpa de Cristina Montes Mateo, recoñecida arpista, que ofrece un programa de música orixinal para arpa sola de nove compositoras españolas. De seguido, o mércores 9, botaremos unha ollada multidisciplinar á obra de Maruja Roca coa estrea absoluta de ‘120 fotografías + 8 fabulacións’.

O xoves 10 chega o concerto da Banda Municipal de Música que colabora coas Xornadas como é habitual cada ano. Faino co programa ‘Elas’ con obras compostas todas por mulleres entre as que podemos destacar ‘A raíña Lupa’ de María Mendoza, gañadora de numerosos premios de composición. Será na praza das Praterías. Paco Varoch, piccolo, e Adrián García, percusión, achégannos ‘Dolce Tormento’ o venres 11, con composicións ou adaptacións todas de mulleres: Marina Uceda Farré, Martina Sabariego ou Carla Rees, entre outras.

O luns 14 e de novo o luns 21, a musicóloga Rosa María Fernández preséntanos ‘Elas fan ópera’, un percorrido polas diferentes aportacións que teñen feito a esta arte contemporánea as máis sobresaíntes dramaturgas, compositoras, directoras de escena e cantantes. O mércores 16 as Xornadas chegan ao CGAC onde poderemos gozar de ‘Catro continentes’ coa pianista Elisa Vázquez Doval, un programa de novo formado íntegramente por composicións feitas por mulleres.

O xoves 17 temos outra das colaboracións habituais das Xornadas: a da Real Filharmonía de Galicia. Dirixidos e dirixidas por Diego García Rodríguez, presentan un programa de catro compositoras de moi distintas xeracións e culturas. Unha delas, Raquel García-Tomás, acompañarános nun Conversando que teremos antes do concerto xunto tamén ao director.

O martes 22 o Trío Zukan presenta ‘Miradas Sonoras’ e o venres 25 chega ‘Un pecado cheo de pracer’ da man de Vertixe Sonora. Ambos programas con obras compostas por mulleres e no caso de Vertixe inclúe a estrea absoluta de catro delas de Yulan Yu, Manuela Guerra, Eda Er e Alyssa Aska.

Pechamos a programación o martes 29 con ‘Cello&Electronics’ da man de Margarida Mariño, violonchelista, e o deseño de iluminación e escenografía de Laura Iturralde.

Pode consultarse o programa e información específica de cada evento en compostelacultura.gal

Entrada de balde previa retirada de convite

As xornadas celébranse en diferentes espazos da cidade: Auditorio de Galicia, Teatro Principal, CGAC e Praza das Praterías. Todos os eventos serán con entrada de balde, previa retirada de convites. As entradas poderán collerse, como é habitual, semanalmente, a través da web compostelacultura.gal desde as 10.00 h da mañá de cada luns. Tamén de xeito presencial no novo despacho de billetes de Compostela Cultura, na Zona C. Punto de Información Cultural (Preguntoiro, 1) no seu horario habitual: de martes a sábado de 11 a 14 e de 16 a 19 h e domingos de 11 a 14 h. Ademais, tamén se poderán retirar desde unha hora antes de cada evento no despacho de billetes do Teatro Principal e desde unha hora e media no do Auditorio de Galicia, se para daquela quedan billetes disponibles.

MÁIS INFORMACIÓN
  • Celébranse do 1 ao 29 de xuño no Auditorio de Galicia, Teatro Principal, CGAC e Praza das Praterías, organizadas polo Concello de Santiago (Compostela Cultura), o CGAC, a USC, a Deputación da Coruña e o Consorcio da cidade
  • Serán un total de tres coloquios e nove concertos cunha programación case completa de obras compostas por mulleres; todas as actividades serán de balde previa retirada de convites