Alberto Velasco abre o espazo de danza do Festival C co inconformismo de ‘Mover montañas’

31/08/2025

O cemiterio do parque de Bonaval volverá converterse este luns en escenario para as artes do movemento do Festival C 
O creador valisoletano Alberto Velasco inaugura o espazo o luns 4 ás 20 horas cun traballo que se rebela fronte á gordofobia e a normatividade dos corpos en danza e que propón o folclore como elemento vivo e  cara ao encontro entre tradición e modernidade
Ao longo do mes de agosto, o mesmo espazo dará abeiro aos traballos do Colectivo Glovo, o Colectivo DeXeito e a Fran Sieira Compañía de Danza.
O acceso a todos estes espectáculos é libre e de balde
 

Liberar o baile de rixideces e estereotipos é a descomunal tarefa na que se embarca Alberto Velasco en Mover Montañas, o espectáculo que abre o vindeiro luns ás 20.00 horas o espazo de danza do Festival C. O cemiterio de Bonaval converterase daquela en escenario de excepción para dar acubillo a esta peza deseñada para espazos non convencionais que, durante 40 intensos minutos, mergulla o público nun baile fronte ao normativo e contra concepcións que ancoran o folclore no pasado. 

A voz de Antonio Gades, en off, serve de premisa e guía para un traballo que nos anima a bailar sen imposturas corporais e culturais, porque “a danza non se inventou para que a baile un señor moi guapo, moi bonito, moi delgado. Estase perdendo o sentido a orixe da danza. Hai que acabar con iso. Todo o mundo ten dereito a danzar. Os pobos bailaban. Os gordos, as gordas, os vellos, os novos… E bailaban por sensacións, pola vida e pola morte. Os pobos que danzan e que cantan non morren en vida”.

E así, esta peza candidata a mellor espectáculo de rúa nos Premios Max e distinguida co premio do xurado ao espectáculo máis anovador do XXV Festival Internacional de Valladolid, conxura os corpos non normativos, a identidade queer e a consciencia contemporánea para rebelarse contra a gordofobia ao tempo que esculca a esencia mesma do folclore para presentalo como lugar de encontro e tránsito entre tradición e modernidade. Pois, a dicir do autor, “a tradición deixa de ter sentido unha vez que se rexistra e se obriga a repetir. A tradición debe sentirse coidada, escoitada, para despois disolverse no tempo sen resistencias e dar lugar a novas tradicións futuras”. 

Con creación, textos e interpretación de Alberto Velasco, Mover Montañas conta con coreografía do mesmo autor en colaboración con Manuel Liñan & Osa + Mujica, música de Mariano Marín, percusión de Palo Martin Jones, vestiario de Sara Sánchez de la Morena, xastrería de Manuel Paul e máscaras de Iker de la Calle. 

O espectáculo foi desenvolvido dentro do programa de residencias da Compañía Nacional de Danza e coproducido por Festival TAC Valladolid e Festival Danseu e chega a Compostela como parte do Festival C e no marco do circuíto Danza a Escena do Instituto Nacional das Artes Escénicas e da Música (INAEM). A súa representación no parque de Bonaval é de acceso libre e de balde.

Alberto Velasco

Actor e creador indispensable na escena española, a súa formación e visión multidisciplinar da escena baixo un concepto ecléctico conseguiu un estilo único e recoñecible en continua evolución. Ten traballado con Carlota Ferrer, Alberto Conejero, Chevi Muraday, Jerome Bél, Marta Carrasco, David Serrano ou Hiroko Tanahashi, entre outras/os grandes profesionais.

Na extensa relación de traballos creados ou dirixidos por Velasco, destacan VACA! (2008), Mademoiselle Monarquia (2010), Clift (2025) Danzad Malditos (2015) Dance to Death (2016) La Inopia; Coreografías para un bailarín de 120 kg (2017),  Escenas de Caza (2018) ou Clic; cuando todo cambia (2020)

O seu labor conta con numerosos recoñecementos, como o premio Max ao espectáculo revelación por Danzad Malditos (2015) ou o premio Godoff ao mellor espectáculo por Sweet Dreams (2022) que lle valeu tamén o premio da Unión de Actores ao mellor actor protagonista de Teatro. A Unión de Actores concederíalle tamén o premio ao mellor actor de elenco en 2023 pola súa interpretación en Nadadores Diúrnos. 

Alberto Velasco colaborou tamén na dirección de escena de pezas de Manuel Liñan, como ¡VIVA! (2019) (Premio Max do Público 2020), La otra escena ou  Pie de Hierro (2021), e de Carlos Rodríguez en Eterno / Ballet Flamenco Homenaje a Picasso (2022) e ten participado en numerosos traballos para televisión e cinema. 

O Festival C 

O Festival C é unha iniciativa do Concello de Santiago a través de Compostela Cultura que conta co apoio da Deputación da Coruña e a colaboración de programas como o Apego ou Danza a Escena,  do Instituto Nacional das Artes Escénicas e da Música (INAEM). 

Do 4 ao 28 de agosto, a súa sexta edición levará a distintos espazos da cidade un regueiro de sesións de balde e para todos os públicos con circo, danza, teatro de rúa, poesía, música, contos, maxia e cinema da man de compañías e artistas galegas e visitantes para encher de creatividade as tardes e noitiñas do verán.

Todas as actividades son de carácter gratuíto e acceso libre agás os obradoiros de circo para a rapazada que, malia ser tamén de balde, precisarán inscrición previa no enderezo circonoveoficina@gmail.com para garantir que non se superan as prazas dispoñibles en cada sesión. Arrancan tamén este luns 4 ás 11.30 horas coa Casa das Máquinas como punto de encontro. Unha vez reunido o grupo e sempre que o tempo o permita, a comitiva circense desprazarase ao parque de Galeras para pór en práctica acrobacias, malabares, equilibrios, danza, clown, teatro, ritmo e xogos, en sesións sempre adaptadas ao nivel e momento de cada participante. Cada grupo está limitado a 25 participante e para inscribirse cómpre indicar no texto nome completo e idade da/o participante e datos e teléfono do contacto da persoa adulta ao cargo. 

A información ao detalle de todas as actividades que conforman o Festival C está dispoñible na web compostelacultura.gal. O cambios que puidesen producirse por mor de calquera incidencia ou por causas meteorolóxicas serán anunciados nesa web e nas redes sociais de Compostela Cultura.