25 espectáculos na programación de Artes Escénicas de Compostela Cultura para este 2019

En total son 26 as compañías que pasarán polo Teatro Principal ou o Auditorio de Galicia representando un total de 25 espectáculos, cifras que aumentarán porque a programación completarase con máis eventos no segundo semestre do ano.

A programación faise en colaboración con diferentes circuítos: a Rede Galega de Teatros e Auditorios de AGADIC da Xunta de Galicia; e PLATEA e Danza a Escena da La Red de Teatros y Auditorios, Circuitos y Festivales, ambas do INAEM. Ademais, este ano como novidade presentouse o Club C! que ofrece 24 actividades paralelas relacionadas coas obras, todas elas de balde.

Tres eixos temáticos: Escena GZ, TerritoriodasMulleres e MemoriaPresente

A programación escénica de 2019 de Compostela Cultura está vertebrada en tres eixos temáticos, liñas que se entrecruzan e deseñan itinerarios que se complementan, que mesturan xéneros e discursos escénicos, que nos mostran diferentes puntos de vista e dan boa conta da poliédrica creación escénica de hoxe en día. Son EscenaGZ, que aglutina discursos e compañías consolidadas e proxectos novos e singulares, que teñen cabida nos escenarios compostelás abe rtos sempre ás/aos creadoras/es do país; TeritoriodasMulleres, coas voces femininas da escena actual, un abano de creadoras e intérpretes destacadas; e MemoriaPresente, proxectos que afondan no pasado para reconstruír o presente, chamadas de atención para (re)ver a historia con outros puntos vista, para relembrar e reescribir con outra mirada desde un presente máis crítico.

Así, dentro de EscenaGZ poderá verse o traballo de compañías consolidadas e proxectos novos e singulares do noso país: Teatro do Noroeste, Pistacatro, A Berberecheira de Chévere, Matarile Teatro… e a estrea das últimas obras de Voadora, Producións Teatrais Excéntricas, Redrum Teatro e  Os Monicreques de Kukas. Ademais, e xa dentro do Compostela Cultura En Familia, estarán as propostas de Xoán Curiel e a Banda do Verán, Caramuxo Teatro ou Elefante Elegante. Nesta sección tamén haberá espectáculos chegados de fóra do país como o ‘Ulises’ de Gorakada e o ‘Distans’ de Vol’e Temps.

En canto á programación de danza, o ciclo recolle espectáculos dos catro últimos Premios Nacionais de Danza: Manuel Liñán, Sol Picó, La Intrusa e Daniel Abreu. Tamén estarán La Macana, Fran Sieira, Elahood, Pistacatro, Duelirium e Traspediante con propostas para todos os gustos que parte desde o tradicional ata chegar ao contemporáneo, pasando polo flamenco ou a danza urbana, así como o primeiro espectáculo de danza vertical de Galicia.

O segundo dos eixos temáticos, TerritoriodasMulleres compila traballos das voces femininas da escena creadoras e interpretes das que podemos citar, entre outras, a Iria Pinheiro, que presenta ‘Anatomía dunha serea’ no Principal ou a Lola Herrera que trae ao Auditorio de Galicia o seu ‘Cinco horas con Mario’.

E o último dos eixos é MemoriaPresente que selecciona proxectos que afondan no pasado para reconstruír o presente como ‘La Zanja’ de Titzina Teatro, ‘Mundo obrero’ de Teatro del Barrio, ‘Cinco horas con Mario’ de Pentación ou ‘Donde el bosque se espesa’ de Micomicón.

Club C!

O Club C! é unha novidade da programación que busca afondar na experiencia cultural de Compostela. Trátase dunha proposta de actividades para se achegar de xeito diverso aos contidos das actividades culturais compostelás. Comprende actividades que buscan coñecer mellor as propostas artísticas que nos ofrece a programación cultural municipal e deste xeito afondar na experiencia como espectadores culturais:

#TRAS DO PANO: Visitas guiadas polos espazos escénicos municipais de Compostela.

#POÑER O CORPO: Actividades arredor da programación de danza e artes do movemento.

#PASEA: Pasear e falar, camiñar e compartir. Aprender nunha camiñada.

#CONVERSANDO: Programa de encontros, manifestacións orais e faladoiros arredor dos contidos e liñas temáticas que conflúen nos espectáculos desta programación.

#POSFUNCION. Unha vez cae o pano, os/as convidados/as, persoas con relación coas temáticas tratadas nas pezas, ofrecerán o punto de vista práctico, serán quen contraste o que a obra conta, o que “quere dicir” con como se vive desde a realidade do presente esas mesmas situacións. A partir de aí, o debate estará aberto ao público asistente e aos elencos artísticos.

#OBRADOIROS MULTIPLICA: Batería de obradoiros participativos para expandir as posibilidades temáticas, relacionais e de contextualización dos espectáculos aos que se adscriben.

Venda de entradas e prezos

As actividades do Club C! son todas de balde, algunhas delas com entrada libre ata completar a capacidade da sala e outras previa inscrición en comunicacion@auditoriodegalicia.org. A asignación de prazas farase por estrito orde de chegada da solicitude.

En canto aos espectáculos os prezos son de 4 euros os familiares e 10, 12 e 14 € o resto. Ademais, hai unha serie de descontos e bonificacións. Existe a posibilidade de mercar o bono familiar (mercando 3 entradas, a cuarta sería de balde) e para os espectáculos xerais, hai un 50% de desconto para diversos colectivos (persoas desempregadas, estudantes, menores de 25 anos, xubiladas, maiores de 65 anos, perceptoras de rendas sociais, e para familias numerosas ou monoparentais).

Poden mercarse as entradas en compostelacultura.gal e no despacho de billetes do Teatro Principal (aberto de martes a sábado, máis días de evento, de 18 a 21 h). Para os espectáculos que se celebran no Auditorio de Galicia, tamén no propio Auditorio os días de evento desde unha hora e media antes de que comece.

TODA A INFORMACIÓN EN compostelacultura.gal