Bota a andar no Auditorio de Galicia a mostra 'Antifémina' de Colita

A ollada insubmisa de Colita enche dende este mércores as paredes do Auditorio de Galicia. A sala de exposicións Isaac Díaz Pardo acolle xa a exposición Antifémina, unha proposta que recupera o proxecto gráfico que a fotoxornalista catalá realizou xunto á escritora Maria Aurèlia Capmany e que se converteu, co paso do tempo, nun dos referentes do feminismo visual da Transición.

A mostra, comisariada por Francesc Polop, director do Archivo Colita Fotografía, e coproducida por La Fábrica e o Círculo de Bellas Artes,forma parte da programación de Artes Visuais que o Concello de Santiago desenvolve a través de Compostela Cultura co apoio do Consorcio de Santiago e ofrece unha ollada crítica sobre a construción social da feminidade na España franquista.

O acto inaugural estivo presidido pola alcaldesa de Santiago, Goretti Sanmartín, e contou coas intervencións do director-xerente do Auditorio de Galicia, Xaquín López; da directora de exposicións de La Fábrica, Ana Berruguete; e do comisario da mostra. Nela estiveron presentes tamén a concelleira de Capital Cultural, Míriam Louzao; a directora de programación e exposicións do Círculo de Bellas Artes, Laura Manzano; o director da área de exposicións e editorial de La Fábrica, César Martínez-Useros; o xerente do Consorcio de Santiago, José Antonio Domínguez Varela, a responsable de exposicións e actividade cultural do Auditorio de Galicia, Chus Busto, e integrantes da corporación municipal.

inauguracion_antifemina.colita_g.sanmartin_pixelinphoto.15.jpeg

^{Intervención da alcaldesa Goretti Sanmartín (Foto: Pixelín Photo)}

Na súa intervención, Gorett Sanmartín apuntou que "Antifémina permítenos facer unha viaxe no tempo aos primeiros anos da Transición, cando aínda se repetían os modelos de feminidade impostos polo franquismo, e recuperar, a través das imaxes de Colita e das palabras de Maria Aurèlia Capmany, unha ollada desde as marxes que amplía o relato das mulleres daquela época". Para a alcaldesa "é un privilexio poder gozar en Santiago de Compostela dunha exposición como esta, que recupera unha obra que foi silenciada e que hoxe nos permite reflexionar, a través das imaxes e das palabras, sobre o feminismo, sobre a súa historia e sobre os retos que aínda temos por diante". 

inauguracion_antifemina.colita_a._berruguete_pixelinphoto.1.jpeg

^{Intervención de Ana Berruguete, directora de exposicións de La Fábrica, entidade coprodutora da mostra xunto con Círculo de Bellas Arttes (Foto: Pixelín Photo)}

Ana Berruguete, directora de exposicións de La Fábrica, remarcou a importancia de "volver poñer estas fotografías sobre o muro e darlles contemporaneidade, porque, a pesar de ter cincuenta anos, seguen resoando na nosa sociedade e convidan a unha reflexión sobre discursos e estereotipos que aínda hoxe están moi presentes.”

inauguracion_antifemina.colita_pixelinphoto.13.jpeg

^{Intervención do comisario da mostra e director do Archivo Colita Fotografía, Francesc Polop (Foto: Pixelín Photo)}

O comisario da exposición e director do Archivo Colita, Francesc Polop, salientou "nesta exposición ides atopar, ante todo, fotografía: un percorrido pola mirada de Colita que constrúe un discurso feminista a partir de imaxes aparentemente normais, pero moi potentes, porque esa normalidade —esa realidade— é profundamente incisiva e revolucionaria”.

inauguracion_antifemina.colita_recursos_pixelinphoto.24.jpeg

^{Detalle da nova edición do volume Antifémina, reetitado e 2021 por iniciativa da propia Colita coa asistencia de Francesc Polop (Foto: Pixelín Photo)}

Publicado en 1977 e retirado do mercado pouco despois por ser considerado inapropiado para a España do momento, o volume Antifémina converteuse nun libro de culto que cuestionaba, con ironía e espírito crítico, os estereotipos da feminidade promovidos durante o franquismo. A exposición presenta agora este traballo por primeira vez en formato expositivo, como homenaxe póstuma a Colita e como reivindicación da súa ollada comprometida.

Máis de 130 fotografías organizadas en dez seccións constrúen un percorrido que aborda cuestións como a construción social da feminidade, os roles impostos ás mulleres ou as formas de representación do corpo feminino. A través destas imaxes, Colita ofrece un retrato plural e complexo das mulleres nun contexto marcado pola represión, o conservadorismo e a desigualdade.

inauguracion_antifemina.colita_recursos_pixelinphoto.1.jpeg

^{Asitentes á inauguración da mostra (Foto: Pixelín Photo)}

A mostra poderá visitarse até o 1 de agosto, de luns a domingo, en horario de 10.00 a 14.00 e de 16.00 a 20.00 horas (os días con eventos no Auditorio a sala de exposicións pecha ás 19.00 horas), con acceso libre e de balde. Ademais, o Auditorio ofrece un programa de visitas guiadas entre os meses de marzo e xuño, que permite afondar nas claves da exposición mediante percorridos comentados de aproximadamente 45 minutos, previa inscrición.

inauguracion_antifemina.colita_autoridades_pixelinphoto.jpeg