CONTEMPORÁNEAS 2026 · 2027
FRAMES PERCUSSION
Sabela Castro, Javier Delgado, Daniel Munarriz e Miquel Vich, percusión
Helena Otero Correa, saxofóns
Itziar Viloria, electrónica en vivo e composición
PROGRAMA
Sarah Hennies (1979) Lives (2) para ensemble de percusión* (2001)
Raquel García-Tomás (1984) Pictures of the floating world para dous percusionistas, saxofón, vídeo e electrónica (2017)
Itziar Viloria (1997) Inventario de gustos, memorias y nostalgias** (2026)
*Estrea en España **Estrea absoluta. Encargo de Frames Percussion
Hai composicións que esixen presenza corporal, conciencia do espazo e atención ao detalle máis fugaz. Así, a música deixa de ser só algo que acontece no tempo e convértese nun espazo habitable. As pezas deste concerto comparten esa vontade de ampliar esa experiencia: coa estadounidense Sarah Hennies, un referente da percusión experimental e do postminimalismo, viaxamos cara ao interior do son en Lives (2). Lonxe da frialdade xeométrica tradicional, esta obra pon o foco na resistencia do corpo e na acústica da sala. Do eco suspendido pasamos á sinestesia desbordante de García-Tomás, quen fusiona percusión, saxofón, electrónica e vídeo. Inspirada nos gravados eróticos (shunga) do ukiyo-e xaponés, os seus sete movementos entrelazados traducen timbres en cores e formas. A peza de estrea de Itziar Viloria inscríbese nesa mesma procura, incorporando unha voz que amplía a invitación a experimentar a música desde dentro.
