O obxectivo desta nova convocatoria para a selección de proxectos de creación artística e de comisariado para a Zona C -que promove o Auditorio de Galicia a través do selo Compostela Cultura- é o fomento do debate e a reflexión crítica arredor da arte contemporánea. A Zona C convértese así no lugar onde creadoras/es e comisarias/os poidan visibilizar proxectos específicos e efémeros e actividades de mediación que propicien encontros con diferentes públicos.
Aberta á participación individual ou colectiva, a convocatoria diríxese a artistas e comisarias e comisarios que naceran ou residan en Galicia e que teñan unha idade inferior aos 35 anos no momento da presentación da solicitude.
Todas as persoas que se presenten deben cumprir os requisitos que se especifican nas bases.
- PRAZO de un mes que se conta a partir do día seguinte á publicación da resolución no taboleiro de anuncios do Auditorio de Galicia.
- PRAZO ABERTO ATÉ 13 de maio ás 23.59 h.
- INSCRICIÓN mediante solicitude xeral en sede.compostelacultura.gal
Imaxes dos traballos beneficiarios da convocatoria anterior, desenvolvidos pola artista Nerea Cordeiro, polo comisario Sergio Meijide a partir da obra de Javier Martín, e pola artista Ana Moure Rosende
Modalidades, criterios de valoración e dotación
A convocatoria distingue dúas modalidades de proxectos, de creación artística e de comisariado, e só poderá presentarse unha candidatura por modalidade.
A modalidade de proxectos de creación artística chama as persoas creadoras da contorna contemporánea galega a presentar propostas de intervención de temática libre para desenvolver nos espazos expositivos do primeiro e segundo andar da Zona C · Punto de Información Cultural. Seleccionaranse até 3 proxectos de intervención artística que contarán, cada un deles, cunha dotación de até 4.000 euros (impostos incluídos). Este orzamento deberá incluír os custos relativos á produción transporte e seguro das obras expostas, ás viaxes, dietas, e aloxamento e ás actividades de mediación propostas, así como aos dereitos de autoría ou calquera outro desembolso que supoña a realización da exposición.
A modalidade de proxectos de comisariado diríxese a persoas dedicadas á práctica de comisariado entendida como a relación que desenvolven en contacto con profesionais da creación, a través do discurso artístico e do deseño expositivo. Nesta modalidade, os requisitos de idade e procedencia aplícanse ás persoas solicitantes, pero non ás e aos artistas coas que traballan. Como acontecía na modalidade anterior, só se poderá presentar un proxecto de curadoría por solicitante, de temática libre e ideado para a súa execución na Zona C. O proxecto seleccionado contará cun orzamento de 6.000 € (impostos incluídos), que deberán sufragar os custos de produción, transporte e seguro das obras expostas; honorarios, viaxes, dietas, e aloxamento de curadoras/es e artistas, actividades de mediación propostas e calquera outro desembolso que supoña a realización de intervención, alén dos dereitos de autoría ou aqueles derivados da xestión das pezas con artistas ou con fondos de coleccións.
En ambas as modalidades, a montaxe, a desmontaxe e o deseño dos elementos de difusión e de calquera material que se realice da intervención correrán a cargo do Auditorio de Galicia.
Na avaliación de todas as solicitudes, que efectuará o persoal técnico do Auditorio, terase en consideración a calidade e coherencia do proxecto, a súa solidez formal e conceptual, a súa viabilidade con base na adaptabilidade á Zona C, a optimización dos recursos económicos e materiais, a conexión do proxecto coas correntes actuais de creación contemporánea e calidade e relevancia das actividades de mediación (cunha cualificación de até 75 puntos).
Todas as propostas de intervención deberán respectar a arquitectura e composición estrutural da Zona C, dialogar co espazo patrimonial sen danalo e non se aceptarán intervencións que supoñan unha modificación da súa estrutura ou configuración. Non poderán presentar solicitude aquelas persoas seleccionadas en anteriores convocatorias para a Zona C. En caso de non houber concorrencia para ambas as modalidades ou de quedar deserta algunha delas o Auditorio de Galicia poderá́ distribuír a contía dos proxectos seleccionados, sempre e cando exista dispoñibilidade orzamentaria.
Imaxe portada Sobre debuxar, fiar e habitar, Nerea Cordeiro, Zona C 2024-2025
Na imaxe da cabeceira, fotografías dos proxectos:
- Sobre debuxar, fiar e habitar, Nerea Cordeiro, Zona C 2024-2025
- Beltenebros, obxectos fotográficos, Javier Martín, artes vivas; Sergio Meijide, comisario, Zona C, 2025
- Acumulacións dun presente moi pasado, Ana Moure Rosende, Zona C, 2025
Zona C
