CONTRAPRODUCIÓNS
Idade recomendada: público adulto
Duración: 80 min
Lingua: castelán
Nunha pequena vila de España, durante o velorio dunha anciá chamada Pilar, dúas mulleres que non se coñecen están a piques de descubrir que comparten moito máis ca unha habitación incómoda, un biscoito de limón e unha coroa de flores asinada por «o veciño Mauro».
Leo, a neta da falecida, regresa á casa familiar despois de anos de distancia. Inés, unha moza descoñecida, aparece cunha carta notarial e unha herdanza inesperada. O que comeza como un malentendido vai revelando segredos ocultos, identidades entrelazadas e unha historia que nos leva ata a mocidade da propia Pilar na España da posguerra.
Entre mobles cubertos, un reloxo de cuco que interrompe cada momento incómodo e os restos do que quedou por dicir, Yo solo quiero irme a Francia é unha comedia amarga sobre a identidade, o abandono e a herdanza emocional que atravesa xeracións.
Unha obra na que o real e o máxico conviven con naturalidade, na que o humor serve de defensa ante a dor e na que, ás veces, irse a Francia non é unha fuxida... senón un acto de liberdade.
