ARTEFEITO e IGAXES
(Teatro)
Idade recomendada: ESO e Bacharelato
Duración: 60 min
Lingua: Galego
Unha obra teatral centrada na realidade dos mozos e mozas que se atopan en situación de tutela. Parte da sociedade aínda pensa que os nenos e nenas que medran en vivendas tuteladas se atopan nesa situación por facer algo malo. Non é verdade. Son mozos e mozas coma calquera outras, con soños e aspiracións, pero que parten dunha situación de desvantaxe. Os prexuízos non poden ser un peso engadido. A utilización de acrónimos deshumanizantes como MENAS, así como o racismo integrado nos medios de comunicación, reforza a estereotipación destes menores como persoas conflitivas cando, en realidade, son só nenos e nenas que tiveron que fuxir dos seus países para poder ter unha vida mellor. Soños pretende abordar dende as artes escénicas a situación de discriminación e exclusión social que sofren moitos menores que medran en vivendas tuteladas para chegar a un público máis amplo e acabar cos estigmas.