ORQUESTRA SINFÓNICA DE GALICIA
Thomas Dausgaard, director
PROGRAMA
ANTON BRUCKNER (1824-1896)
Sinfonía núm. 9 en re menor (WAB 109)
I. Feierlich, misterioso
II. Scherzo. Bewegt, lebhaft – Trio. Schnell
III. Adagio. Langsam, feierlich
IV. Finale. Misterioso. Nicht Schnell (Reconstrución de John A. Phillips e Giuseppe Mazzuca)
A Orquestra Sinfónica de Galicia volve a Compostela baixo a dirección de Thomas Dausgaard para facer parte da tempada Historias cun programa centrado nunha das obras máis fondas e ambiciosas do repertorio sinfónico: a Sinfonía núm. 9 en re menor de Anton Bruckner. Concibida como un verdadeiro testamento espiritual e dedicada “ao amado Deus”, esta obra acompañou o compositor nos seus derradeiros anos e reflicte con intensidade a súa profunda relixiosidade e a súa concepción monumental da forma sinfónica.
Nesta ocasión interpretarase a sinfonía na súa concepción completa en catro movementos, incluído o Finale reconstruído a partir dos materiais deixados por Bruckner, froito dun rigoroso traballo musicolóxico. Lonxe de ser unha obra inconclusa por falta de inspiración, a Novena foi obxecto dun labor constante ata a morte do autor en 1896, e o cuarto movemento permite comprender a obra como unha arquitectura unitaria coroada por unha poderosa síntese final.
Ao longo dos seus movementos, a sinfonía desprega unha intensa viaxe expresiva: desde a solemnidade e a tensión do inicio, pasando por un Scherzo de carácter obsesivo e inquietante, ata un Adagio de fondo calado espiritual que funciona como despedida. O Finale engade unha dimensión de loita, afirmación e transcendencia, revelando a audacia do último Bruckner e ofrecendo ao público a posibilidade de escoitar a súa derradeira sinfonía como a gran catedral sonora que concibiu para pechar a súa traxectoria artística e vital.
