NACHO VEGAS presenta o seu último traballo, 'Violética', no Auditorio de Galicia. Vegas é a día de hoxe un dos artistas máis consolidados e respectados do Estado español. Nos escenarios desde os anos noventa con grupos como Eliminator Jr ou Manta Ray, comezou a súa carreira en solitario en 2001 co selo independente madrileño Limbo Starr mentres paralelamente formaba o grupo Lucas 15 con outros músicos asturianos. Con este selo publicou o seu primeiro disco en solitario Actos inexplicables (2001).
Desde que comezou a súa traxectoria en solitario, Nacho Vegas publicou varios discos e EPs, e tamén fixo destacadas colaboracións como ‘El tiempo de las cerezas’ con Enrique Bunbury (2006) ou ‘Verano Fatal’ (2007) con Christina Rosenvinge.
En 2010 lanzouse á aventura da autoedición dando vida a Marxophone, unha plataforma de autoedición discográfica co que editou o resto dos seus traballos até o momento. Baixo esta etiqueta viu a luz en 2011 ‘La Zona Sucia’, un traballo que foi recoñecido como o “Mellor Álbum do Ano” nos Premios da Música Independente. A este traballo seguiralle, en novembro do mesmo ano, o mini-álbum ‘Como hacer crac’ (2011). Foi entón cando a música de Nacho Vegas foi collendo outro rumbo, sobre todo nas letras, que a partir de aquí abrazaranse a unha temática máis política e social, algo que se consolidou no disco ‘Resituación’ (2014) e no EP que lle seguía, ‘Canciones Populistas’ (2015).
O pasado mes de xuño, Nacho Vegas editou ‘Violética’ (Marxophone, 2018), un disco dobre de Nacho Vegas con Edu Baos, Abraham Boba, Manu Molina, Joseba Irazoki, Luís Rodríguez e César Verdú. Foi gravado por Paco Loco no seu estudio de El Puerto de Santa María, con gravacións adicionais no Estudio Fase 4 de Xixón por Carlos Stro e en El Cariño de Mozota por Edu Baos. A mestura realizouna César Verdú e o master Víctor García en Ultramarinos Mastering (Barcelona). O álbum contén 18 temas e conta con diversas colaboracións entre as que destacan as do Coru Antifascista Al Altu La Lleva, Cristina Martínez (El Columpio Asesino), Christina Rosenvinge ou Maria Rodés.
