A nova mostra do Auditorio de Galicia recupera o traballo fotográfico que Colita (Isabel Esteva, 1940-2023, Barcelona) publicou en formato libro xunto con textos da escritora catalá Maria Aurèlia Capmany (1918-1991, Barcelona). Foi un proxecto a catro mans considerado co tempo como o primeiro libro gráfico abertamente feminista da Transición. Antifémina publicouse en 1977 e foi retirado do mercado pouco despois pola propia editorial por decisión do seu novo director, quen o considerou inapropiado para a España do momento, converténdose así nun libro de culto crítico e reivindicativo. En 2021 Colita e Francesc Polop, comisario desta exposición, recuperaron o volume, reeditado e publicado pola editorial Terranova e polo Concello de Barcelona.
Este é o libro que se amosa por vez primeira en formato expositivo como homenaxe póstuma a Colita e como reivindicación da figura destas dúas mulleres intelectuais e valentes que loitaron de maneira clara e directa para dignificar o feito de ser muller nunha sociedade que comezaba a emerxer da longa ditadura franquista.
A mostra reúne máis de 130 fotografías estruturadas en dez seccións que abordan, con ton crítico e didáctico, o debate sobre a feminidade convencional: a muller, submisa, perfecta casada, pasiva e sacrificada. Nelas, Colita retrata a vellez, o traballo, a relixión, a prostitución, a cousificación, a marxinación, as modelos o disfrace ou o piropo en imaxes de corpos apoderados, sólidos, macizos, nus, anoréxicos, eróticos, decorativos, marcados pola xuventude ou erosionados pola vellez. Un imaxinario que permite a quen visita a mostra comprender o significado de ser muller no franquismo, nun contexto de represión e discriminación marcado polo pechado conservadorismo, escurantismo e desigualdade contra as mulleres.
Esta exposición é unha coprodución de La Fabrica e o Círculo de Bellas Artes de Madrid.
Imaxe Entrando al mar [Entrando no mar] Sitges, 1966_ © Archivo Colita Fotografía
Isabel Steva Hernández naceu en Barcelona en 1940 e é coñecida artisticamente como Colita. O seu alcume vén dunha historia contada polo seu pai sobre o seu nacemento “debaixo dunha col”. Formouse xunto a fotógrafos como Oriol Maspons, Miserachs, Català-Roca e Pomés. Retratou a vida cotiá de Barcelona: o mundo xitano, o flamenco, o Barrio Chinés ou La Rambla. Creou unha enorme galería de retratos de figuras culturais e artísticas do século XX. Estivo vencellada a movementos como a Gauche Divine, a Escola de Barcelona e a Nova Cançó. Durante a Transición documentou acontecementos políticos e sociais clave. Comprometida co feminismo, foi editora gráfica de Vindicación Feminista en 1976. Publicou máis de 70 libros, realizou máis de 40 exposicións e recibiu numerosos premios. Faleceu en Barcelona o 31 de decembro de 2023.
Maria Aurèlia Capmany i Farnés naceu en Barcelona en 1918 nunha familia intelectual. Foi escritora, pedagoga, dramaturga, actriz e política, cunha traxectoria moi diversa. Estudou Filosofía e Letras e participou en actividades culturais clandestinas. Como novelista obtivo premios como o Joanot Martorell e o Sant Jordi. O teatro foi central na súa carreira, tanto na escrita como na interpretación. Impulsou xunto a Ricard Salvat a Escola d’Art Dramàtic Adrià Gual. Mantivo unha forte presenza no cabaré crítico xunto a Jaume Vidal Alcover. Foi unha figura clave do feminismo catalán a través de novelas e ensaios. Participou activamente na política durante a Transición e a democracia. Finou en Barcelona o 2 de outubro de 1991.
Francesc Polop naceu en 1961 en Bolbaite, Valencia, é escultor e deseñador residente en Barcelona. Formouse na Escola Massana e na Facultade de Belas Artes de Sant Jordi. Durante a súa etapa formativa traballou para TVE (en Juego de Niños, entre outros programas) e no ámbito teatral. Participou como deseñador de vestiario, escenografía e axudante de dirección. En 1983 coñeceu a Colita, con quen iniciou unha relación persoal e profesional. Deseñou para ela numerosos libros e publicacións fotográficas. Tamén realizou catálogos e a recuperación e redeseño de Antifémina. Comisariou varias exposicións da fotógrafa en Barcelona, Madrid e Granada. Da súa colaboración xurdiu o Archivo Colita Fotografía. Actualmente dirixe e xestiona este arquivo para difundir a obra de Colita.
