O Festival Plataforma trátase dunha cita anual ineludible para os amantes da cultura e das artes, que chega a diversos públicos cunha proposta interdisciplinar. Entre o 21 e o 25 de maio, o festival dinamizará rúas e prazas da cidade con performances, música, danza, propostas escénicas, talleres e exposicións nunha edición que contará con varias estreas absolutas.
Programa
A bailarina e coreógrafa Nuria Sotelo será a encargada de abrir esta edición do festival coa performance Sobre o extravío ou a arte de perderse, dirixida por Ana Vallés; un solo de danza que nos convida a compartir unha viaxe polo espazo interior e exterior dunha muller. Nesta peza o movemento, o texto, o espazo sonoro, o corpo e os obxectos combínanse para facernos espectadores e cómplices dunha forma de construír(se), habitar, extraviarse e chegar a lugares non previstos. Será o mércores 21 de maio na sede de SGAE ás 20.00 horas.
Uns días antes, o sábado 17, coincidindo co Día das Letras Galegas, e o domingo 18, comezarán as actividades formativas de Plataforma cun obradoiro de performance a cargo da artista Neves Seara. O obradoiro, para o que é necesaria inscrición a través da web do festival plataforma.gal, terá lugar na Fundación DIDAC. O día 23 de maio, os participantes realizarán unha mostra dos resultados na galería Patio de Luz acompañados pola artista. A este obradoiro súmanse outras propostas educativas como o obradoiro infantil Variacións para un mesmo obxecto (isto non é un zapato), dirixido por Ana Gesto, que terá lugar no Parque de Bonaval o día 24 de maio.
O festival organizado pola Cooperativa Performa caracterízase pola deslocalización dos espazos e a aposta pola colaboración entre as institucións culturais da cidade, ademais de pola proposta dunha programación de rúa que sorprende a viandantes e transeúntes. Nesta edición gozaremos das actuacións e performances en múltiples escenarios: Andrea Mosquera e Benxamín Otero serán os encargados de protagonizar o xoves 22 na Praza das Praterías Sinfonía dunha Cidade-Corpo, unha performance, que se estrea por primeira vez, que conecta os sons de Santiago de Compostela e do corpo humano. O venres 23, as artistas portuguesas Vera Mantero e Teresa Silva estrearán en Galicia Un pequeno exercicio de composición, un xogo escénico de presenza e asombro que terá lugar na Sala Agustín Magán. O sábado 24 ás 12:30 inaugurarase a exposición de Francisca Aires Mateus Regarding Far Away Water Won't Save Closeby Fire na Fundación DIDAC, onde a artista portuguesa realizará unha performance con motivo da apertura. Ese mesmo día, as actividades continuarán no CGAC. Así, presenciaranse tres intervencións imprescindibles protagonizadas por Itsaso Iribarren e Germán de la Riva, Itziar Okariz en colaboración con Izar Okariz e as irmás Noa e Lara Castro Lema que estrearán a súa nova performance en primicia. Ao día seguinte, domingo 25, os artistas galegos Alejandra Balboa e Pavel Amílcar interpretarán en Casa das Máquinas Cando lle permito ao corpo aquilo que digo, un diálogo íntimo entre danza contemporánea e música barroca. Para rematar, o festival pecharase nesta mesma localización con Interconexións atlánticas, unha estrea absoluta de Paula Quintas e Ana Gesto que mestura danza, performance, escultura e instalación.
Grazas á súa natureza transversal, o Festival Plataforma intégrase á perfección na programación cultural compostelá, así como na rede galega de institucións públicas e privadas que colaboran con este festival. Un ano máis, Plataforma aposta polo talento local e a igualdade, facendo da cultura o eixo integrador do patrimonio compostelán. Nesta edición, os escenarios da programación serán espazos como a Praza das Praterías, a Fundación DIDAC, a galería Patio de Luz, o parque de Bonaval, a sede da SGAE (Sociedade Xeral de Autores e Editores), Casa das Máquinas ou o CGAC (Centro Galego de Arte Contemporánea), ademais de recuperar a Sala Agustín Magán para usos escénicos.
Organizado pola Cooperativa Performa (Mónica Maneiro Jurjo e Iñaki Martínez Antelo), Plataforma. Festival de artes performativas está realizado co apoio do Concello de Santiago de Compostela a través da Concellería de Capital Cultural, Turismo, Educación e Memoria Histórica, o CGAC (Centro Galego de Arte Contemporánea), a Deputación de A Coruña, Fundación DIDAC e Signus Ecovalor e co apoio de SGAE e Patio de luz.
As entradas para o festival poden adquirirse a través da páxina web:
www.plataforma.gal
