ARTES ESCÉNICAS · DANZA· TEATRO
MOVER MONTAÑAS
Alberto Velasco
Mover montañas é unha peza de danza que reivindica o folclore como un corpo vivo, emocional e colectivo. Lonxe de ofrecer un catálogo de tradicións populares, propón unha viaxe sensorial e contemporánea ás raíces da danza, da música e do rito, alén dos museos e dos rexistros. A través do corpo como canle e da conciencia como ponte, esta creación conéctanos co espírito esencial dun folclore que non entende de fronteiras nin de ideoloxías. Un manifesto escénico que chama á memoria ancestral, á transmisión natural da tradición e á necesidade de recuperar os rituais compartidos como acto de resistencia e celebración.
"UN TERREMOTO DE CARNE QUE ABRA
FENDAS NO INMÓBIL
O MEU CORPO É UNHA MONTAÑA ÁXIL E LIBRE
ÍMOLA MOVER PARA QUE OS PROFETAS
VEÑAN PROFANALA
Nazo froito do encontro entre casteláns e emigrantes andaluces e estremeños. Son fillo de Castela. Son corpo da súa raíz, da súa estepa, do seu ceo erguido, dos ombreiros encolleitos, das xeadas de frío, do anís, das dulzainas, dos quintos, do fútbol, das combinacións, das flores nas cruces, das imaxes aos ombreiros, das engurras e do horizonte. Pero tamén son fillo do quejío, do pasodobre, das verbenas, do ibérico, dos berros na praza, do silencio, das lendas dos bosques, das escopetas e do bafo branco. Son a vibración soterrada dun folclore que atravesa a nosa identidade mestiza. Sinto a miña identidade coma un volcán cheo de lavas moi distintas, de diferentes procedencias que me fan vibrar, estremecer e expandirme. Abrázoas todas. Non deixo que a miña ideoloxía cuestione nada. Sons milenarios e sons que aínda están por escoitar. Non entendo a transmisión da tradición sen evolución. Isto non é un traballo de arqueoloxía nin un rescate museístico de tradicións, é unha canción libre, gozosa e fermosa do que a tradición significa en min. Por iso vou mover as montañas. Por iso vou danzar. Por iso vou chamar aos deuses coa miña danza. Por iso vou traer a chuvia co rito. Por iso vou abrir os brazos ao encontro da emoción que fai que nos xuntemos fronte ao enigma dunha melodía nunca escoitada. Vou vibrar, estremecer, expandir o meu corpo nun espazo aberto ao ritmo poliédrico dunha tradición que está tecida no ADN como por encaixe de bolillos, coidada pola sabedoría da anciá e a ilusión dunha nena. Esperta. Viva. A tradición deixa de ter sentido unha vez que se rexistra e se obriga a repetir. A tradición ten que sentirse coidada, escoitada, para logo disolverse no tempo sen resistencias e dar lugar a novas tradicións futuras"
Alberto Velasco
“Mover montañas”
(FOTO: Nuria Boleda)
FICHA ARTÍSTICA
- Creación e interpretación: Alberto Velasco
- Coreografía: Alberto Velasco, Manuel Liñan & Osa + Mujica
- Música: Mariano Marín
TEXTOS: Alberto Velasco
- Percusión: Pablo Martin Jones
- Vestiario: Sara Sánchez de la Morena
- Bata de cola: José Galván
- Máscaras: Iker de la Calle
- Foto: Dominik Valvo
- Teaser: Guille Centenera
- Deseño: Laura Velasco
- Collage Cartel: Pablo The
- Cadro Técnico: Raúl Escudero
- Voz en off: Petra Martinez
- Produción executiva e distribución: Elena Martínez/ ElenArtesescénicas
- Coprodución: Festival TAC Valladolid e Festival Danseu
- Agradecementos: María Pizarro, Galina Rodriguez, Mario Mediero
