Marie Losier 1
Este foco celebra a prodixiosa capacidade de Marie Losier para pulular entre os talentos máis disruptivos do underground neoiorquino e europeo, transformando a admiración artística nunha íntima relación familiar. Lonxe da reportaxe haxiográfica, Losier accede ao sanctasanctórum de creadores seminais e referenciais para retratalos desde o cálido delirio da complicidade cotiá.
The Ontological Cowboy
(O Cowboy Ontolóxico)
2005
MARIE LOSIER
0:12:00
FIC
«O teatro xira arredor do sexo». Polo menos, iso sostén Richard Foreman, pai do Teatro Ontolóxico-Histérico. The Ontological Cowboy documenta a invocación que Foreman fai do «destino manifesto» do teatro de vangarda: King Cowboy Rufus descende paseando desde San Juan Hill cun suspiro, axitando o seu pano. Foreman interprétase a si mesmo e o elenco escenifica as súas obsesións. Se «o elenco e o equipo sofren por igual», é por unha boa causa: o violento renacemento do teatro estadounidense, con Foreman exercendo de comadroa.
Electrocute Your Stars
(Electrocuta as túas estrelas)
2004
MARIE LOSIER
0:08:00
DOC
Trátase dun retrato onírico de George Kuchar, que atravesa unha tormenta de confeti de neve, escintileos estroboscópicos e vento artificial mentres relata os seus diarios meteorolóxicos. Despois, George reúnese con Janet Leigh na ducha. Cun impermeable vermello e un gorro de baño, lendo banda deseñada e facendo pompas de xabón, describe entre risas os seus rituais de aseo e o proceso de realización da súa película Hold Me While I’m Naked.
Tony Conrad: DreaMinimalist
(Tony Conrad: DreaMinimalist)
2008
MARIE LOSIER
0:27:00
DOC
Retrato onírico de Tony Conrad, cineasta experimental, músico e compositor, artista sonoro, profesor e escritor. O violinista Tony Conrad foi un dos pioneiros do minimalismo neoiorquino e participou, en 1962, no proxecto Dream Musicde La Monte Young xunto a figuras como John Cale e Angus MacLise, futuros membros de The Velvet Underground. Durante moitos anos viviu e traballou con Jack Smith, para cuxa célebre película Flaming Creatures compuxo a música.
Neste retrato de Tony Conrad descubrímolo xogando no seu estudo con disfraces e perrucas, practicando co violín na súa cidade natal, Buffalo, cociñando películas en escabeche, actuando no Tonic e na Bienal Whitney de Nova York, lembrando as súas primeiras funcións de monicreques xunto á súa nai, o seu primeiro encontro con Jack Smith e a súa participación en Flaming Creatures... Dous anos de imaxes, historias e risas para compartir.
Barking in the Dark: The Residents
(Ladrando na escuridade: The Residents)
2025
MARIE LOSIER
0:42:00
DOC
Marie Losier adéntranos no misterioso e inclasificable universo de The Residents, figuras emblemáticas da vangarda musical estadounidense desde hai máis de cincuenta anos. Este colectivo de culto, oculto tras o seu anonimato e os seus traxes icónicos, revolucionou a escena underground coa súa experimentación sonora e a súa atrevida estética visual. Este retrato lúdico e íntimo rende homenaxe á extraordinaria liberdade dunha banda que nunca seguiu as regras.
