ARVIN DOLA E IRENE GAUMÉ·
O GHOST LIVE AV
O Ghost é o título do primeiro longo de Arvin Dola, un traballo que se sitúa nun territorio liminal entre o ambient, o dronee o scoring cinematográfico, articulando un continuum sonoro onde a composición funciona como dispositivo de espacialización afectiva. Na súa tradución ao directo neste formato A/V creado xunto á artista visual Irene Gaumé, O Ghost desenvólvese como un ensamblaxe híbrido de sistemas: sintetizadores, voz e violonchelo entrelázanse cun entorno visual xerado ex profeso, construído a partir da fricción entre materiais analóxicos, técnicas de focus stacking e procesos de intelixencia artificial, dando lugar a unha imaxe en constante estado de inestabilidade e reconfiguración.
Neste tránsito continuo entre o analóxico e o dixital, a peza activa unha investigación sobre a fragmentación da identidade e a multiplicidade das súas proxeccións, propoñendo un desprazamento dos límites entre interioridade e superficie. O Ghost configúrase así como un entorno de activación emocional onde emerxen arquivos latentes e formas en deriva. Un corpo espectral, aberto e mutable como a propia paisaxe que vén dar forma ao conflito entre as nosas distintas versións e a súa imposibilidade de fixación.
