CURTOCIRCUÍTO 2025 · SESIÓN ESPECIAL · FILLOS DO VENTO
Encontro con Brais Revaldería. Unha viaxe inmersiva ao corazón de Galicia
Fillos do vento é un proxecto híbrido e radical do cineasta galego Brais Revaldería que navega entre o cinema e a instalación, entre o visible e o inaudito, e que foi estreadado no pasado Festival de Cannes. Curtocircuíto acolle unha actividade especial na que o autor compartirá o proceso de creación sonora e sensorial da obra, afondando na súa investigación estética sobre a tradición da rapa e o poder dos rituais como forza invisible que modela territorios e memorias. A sesión estrutúrase como unha conversa estendida na que Revaldería analizará a dualidade da peza como instalación visual inmersiva e como filme narrativo en construción, revelando os vínculos conceptuais e técnicos que articulan ambas dimensións.
O encontro culminará coa proxección dunha versión inédita e exclusiva de Fillos do vento, montada especificamente para Curtocircuíto (25’), como adianto do que será a futura longametraxe. Esta peza intermedia, deseñada como experiencia audiovisual autónoma, ofrecerá ao público a oportunidade de mergullarse nunha paisaxe de son e imaxe en constante transformación, onde as bestas actúan como axente poético e político. Un exercicio de cinema en construción, onde o espectador é convidado a habitar o espazo entre o salvaxe e o cultural; unha viaxe ao corazón de Galicia.
