CURTOCIRCUÍTO 2025 · LIVE AV
Martin Messier - 1 drop 1000 years
(1 pinga, 1000 anos)
Os científicos coinciden en que unha pinga de auga percorre o planeta en menos de 1000 anos. Esta pinga dá forma ao noso mundo: transporta nutrientes, calor e organismos vivos, á vez que regula o clima e os ecosistemas do noso planeta. Contribúe ao proceso fundamental do equilibrio da vida.
Baseándose en datos da corrente oceánica global, a vasta corrente que coordina a mestura da auga dos cinco océanos e redistribúe a calor a escala mundial, Martin Messier subliña o papel fundamental da auga como substancia vital.
Nesta hipnótica performance, o artista explora as tensións entre as correntes globais que impulsan o equilibrio planetario e as correntes íntimas que ecoan dentro de cada un de nós. Quince dispositivos suspendidos, auténticas esculturas cinéticas, orquestran o fluxo de partículas de auga en tempo real, materializando a dinámica oceánica. Os patróns xerados, alimentados por datos como a temperatura e a salinidade do océano Pacífico, entrelázanse nunha coreografía visual e sonora. 1 drop 1000 years revélase como un ballet maxistral e poético, que transmite a fraxilidade dos ecosistemas e a delicada harmonía que une todas as cousas na Terra.
Martin Messier
Martin Messier orquestra un diálogo entre o son, a luz e o movemento. As súas galardoadas performances e instalacións (Prix Ars Electronica, Japan Media Arts Awards...) combinan tecnoloxías con elementos naturais —auga, fume, ondas, electricidade— e exploran a manifestación dos fenómenos físicos.
As súas obras adoptan a forma de máquinas sorprendentes, estruturas que parecen minimalistas ou inmateriais. Estes dispositivos preséntanse en importantes institucións internacionais como o Festival TransAmériques, Trafó Budapest, Mutek, Transmediale, Soar e Nemo.
