Celebrando Begoña Caamaño, 10 anos con nós' é un acto organizado polo Concello de Santiago de Compostela para homenaxear a vida e obra da xornalista e escritora, falecida en Compostela en 2014. Programado o domingo 27 de outubro ás 18 horas no Teatro Principal, contará coa presenza de recoñecidas figuras da cultura como Ana Romaní, Andrea Nunes, Guadi Galego, Tero Rodríguez e Uxía que recordarán a autora a través dun percorrido pola súa carreira literaria e poética.
Un tema musical inédito "Morgana" composto por Uxia e Magín, inspirado no seu libro, a actuación conxunta de Guadi e Uxía acompañadas pola arpa de Bleuenn Le Friec e algún outro tema sorpresa comporán a parte musical.
Tero Rodríguez intrepretará "A voz de Morgana", un breve monólogo inspirado na personaxe creada por Begoña Caamaño "no que a palabra abre gabias e rebenta valos".
A entrada é de balde, previa retirada de convites que estarán dispoñibles dende este martes 22 na web de Compostela Cultura e no despacho de billetes da Zona C. Tamén se poderán recoller o propio día da homenaxe no despacho de billetes do Teatro Principal.
