TEMPADA «MEMORIA»
REAL FILHARMONÍA DE GALICIA
Jeannette Sorrell, directora
PROGRAMA
Marco Uccellini: La Bergamasca (arr. J. Sorrell)
Diego Ortiz: Recercada #1 sobre «La Spagna»
Diego Ortiz: Recercada #2 sobre «Passamezzo moderno»
Biagio Marini: Passacaglia
Marin Marais: Suite da ópera «Alcione» (ed. J. Sorrell)
Antonio Vivaldi: Ciaconna en Do (arr. J. Sorrell)
Georg Friedrich Händel: Suite de «Terpsichore» (Il pastor fido)
Antonio Vivaldi: La Follia (arr. J. Sorrell)
Bailamos? corre a cargo da directora e arranxista Jeannette Sorrell, reputada especialista no repertorio antigo. A norteamericana destaca pola súa enerxía escénica, inspirada na súa persoal visión do concepto barroco do Affekt —a transmisión dos estados emocionais a través da música—. O programa ábrese con La Bergamasca de Marco Uccellini, unha danza elegante e sobria que figura entre as poucas obras conservadas do músico. Do compositor renacentista Diego Ortiz interprétase a Recercada 1 sobre «La Spagna», lenta e refinada, e a do «Passamezzo moderno», rítmica e viva, como as Passacaglia de Biagio Marini, do que foi un excelso cultivador entre viaxes e matrimonios. Sorrell arranxa a suite de Alcione do cinematográfico Marin Marais, que dá paso a unha exuberante peza de baile de orixe española, a Ciaconna en Do de Vivaldi. Händel fixo en 1734 a súa persoal homenaxe á danza coa suite do ballet Terpsichore, levado polo furor que causaba en Londres a tradición da danza francesa. Para finalizar, todo un alarde: as 19 variacións que Vivaldi compuxo sobre unha música feita para danzar, La Follia.
