FESTIVAL DE ARTES PERFORMATIVAS
Marta Fernández Calvo. Concerto Menú
Con Su Garrido Pombo, Paulo Pascual e Faia Díaz
Estrea en Galicia
O domingo 13 de setembro ás 20 h preséntase Concerto Menú, un proxecto ad hoc da artista visual Marta Fernández Calvo que consiste nun recital de receitas sonoras. A variedade de sons que xera a elaboración dunha receita é o fío condutor do proxecto multidisciplinar que cuestiona as fontes e a transmisión de coñecemento e que propón a experiencia vital como forma de aprendizaxe. Durante as semanas previas ao evento, a artista seleccionará receitas típicas da veciñanza da cidade. Unha vez realizada a selección, a artista gravará o son de cada participante executando o seu prato na súa cociña. Os sons de cada receita serán transformados en pezas musicais por diferentes compositores que serán, á súa vez, intérpretes das súas pezas no concerto. Os compositores/intérpretes de Concerto Menú son: a música viguesa Su Garrido Pombo, o músico Paulo Pascual e a cantante santiaguesa Faia Díaz. Os menús serán facilitados ao público a modo de programa-receitario.
Ao remate do concerto haberá un encontro cos artistas.
