FESTIVAL C 2021
DE LUGARES E ÓRGANOS
Dous mares, músicas entre dous mundos
Diana Baroni, Grupo 1500, Marco Aurélio Brescia
Diana Baroni, voz e traverso
Lorina Vallaster, voz e frautas
Belén Bermejo, voz
Rafael Guel, guitarra e percusións
Roberto Santamarina, violín e fídula
Jose Manuel Díaz, contrabaixo
Andrés Díaz, frautas, vihuela, dirección
Marco Aurélio Brescia, órgano
A chegada ao Novo Mundo supuxo un xiro copernicano na historia moderna. Especificamente no musical, houbo un pronto recoñecemento mutuo entre pobos que se confrontaban na conquista, mais para os que a música era un xeito de vida e expresión consubstancial á propia existencia diaria. Do encontro entre as músicas ibéricas e as que se facían en América Central e do Sur, xurdiu un rico verxel de melodías e ritmos novos e orixinais, que aínda hoxe perduran. O programa trata de dar mostra dese frutífero encontro, mesturando músicas dun lado e outro do océano, facendo ao tempo unha alegórica homenaxe ao mar polo que viaxaron, de ida e volta, eses ritmos e estilos musicais, os instrumentos e mesmo os propios músicos.
O órgano, testemuña viva dese proceso de retroalimentación musical xerado a partir do século XVI, será o elemento condutor do programa, que permitirá amalgamar influencias diversas, a través de obras que simbolizan esa asimilación de trazos de ambos os dous universos musicais. Esa simbiose estará especialmente representada a través da figura do xesuíta italiano Domenico Zipoli e das músicas chiquitanas procedentes das misións de Bolivia. Pero tamén a formación musical do concerto de hoxe simboliza ese encontro, a carismática frautista e cantante arxentina Diana Baroni, canda o multiinstrumentista Rafael Guel, xúntanse con músicos galegos que navegan por diferentes estilos e influencias, desde a música antiga ao jazz, para ofrecer unha apaixonante travesía entre dous continentes.